喺8年前嘅今日發生咗湄公河慘案，當時兩艘中國貨船「華平號」同「玉興8號」喺湄公河泰國水域行駛，被以緬甸人糯康為首嘅犯罪集團劫持，其後13名船員被岸上多名泰國軍人開槍掃射而死，並遭棄屍河中。香港導演林超賢根據湄公河慘案，改編拍成電影《湄公河行動》。

話說2011年泰國警方喺船上調查嘅時候，發現有95粒用嚟製造冰毒嘅麻黃素，以及一支AK47步槍，當時泰國媒體喺報道入面大肆宣傳，指控兩艘貨船涉嫌走私毒品，同巡查嘅泰國軍警發生衝突，船員因而被擊斃。案件引起中國政府關注，並派員到當地調查，發現有唔少可疑地方，包括船身彈窿屬「行刑式射擊」、船員屍體被綁住雙手同戴上頭套等等，同一般槍戰死傷情況唔同。

案情峰迴路轉，後來有9名泰國軍人自首，承認參與槍殺船員，繼續追查發現佢哋同糯康呢位毒梟有關。喺中國同老撾兩國警方合作之下，最終於老撾拘捕糯康同佢幾名手下，並移交到中國受審。最後查出，糯康係因為中國貨船唔肯交保護費，以及緬甸方面曾徵用中國貨船攻打販毒集團老巢等因素，而懷恨在心，於是連同泰國軍人合謀殺死中國船員。最後，糯康同佢3名手下桑康·乍薩、依萊、紮西卡被判死刑，另外2名手下扎波同扎拖波分別被判死緩同8年有期徒刑。

圖為當年糯康等被告出庭，嚟自網絡。