禮賓府响剛剛過去嘅星期日開放，有唔少市民去參觀同賞花。唔講唔知，禮賓府原來已經有超過160年歷史，座建築仲見證咗香港發展。

根據禮賓府資料，官邸嘅預算為14,940英鎊，响1851年10月起興建，足足起咗四年先落成，而第四任港督寶寧就係第一位主人。歷任港督以至特首都對間官邸做過唔同程度嘅裝修，其中以港督德輔同日治時期嘅修建規模最大。德輔1889年在任期間，決定响東面加建新翼，用嚟做社交活動場地，新翼面積與主建築差唔多，設有宴會廳同飯廳。

去到1941年嘅聖誕，時任港督楊慕琦投降，日軍大舉重建同擴充總督府，包括加設中央塔樓、向海兼有榻榻米嘅傳統和室、小型茶室等。後嚟二戰結束，日軍1945年9月16日响總督府張長枱上面簽投降書。經過一番變遷，總督府重新由港督入住，楊慕琦1946年搬返官邸，拆咗啲日式裝置，改建成四間睡房同浴室。禮賓府伴隨香港一步一腳印走到今天，下次有機會去參觀吓，尋找香港歷史足跡先。

圖一係1880年嘅總督府，圖二係德輔擴建後嘅外貌，圖三係日軍簽降書時所用嘅長枱。

圖片來源：Dennis G. Crow Ltd.及禮賓府網站