依家成日講話香港人有住屋問題，所謂「衣食住行」，香港地少人多，居住問題其實每個年代都有，只係形式唔同咁解。

阿史今次就先講講以前香港寮屋呢個問題。寮屋，以前更多人係叫做木屋，大部分寮屋都係非法佔地而建的臨時居所。上一代嘅香港人，有唔少都住過，而且寮屋區遍布港九新界。咁點解香港以前會有咁多寮屋區呢？呢個又係有大時代背景。

二戰後香港破壞得相當嚴重，唔少本來去咗大陸避難嘅香港居民返嚟時已經無處容身，另外國共內戰，大批內地人逃難嚟香港。面對突然大量增加嘅人口，當時港英政府無乜特別嘅安置措施，所以好多無家可歸嘅人就响山邊起間屋嚟住，慢慢就形成咗香港遍地寮屋嘅情況。

由於呢啲寮屋都係非法搭建，自然唔多穩陣，而且寮屋區非常擠逼，衛生環境惡劣，例如屋內無廁所，又要共用街喉，甚至豬欄响附近都唔係乜嘢奇事。而且住嘅人龍蛇混雜，毒販同賭檔都好常見。寮屋多數係用木搭建，再用鐵皮搭個屋頂，打風落雨就好危險，而且寮屋區通常响山邊，一冧山泥就成間屋無咗。更攞命嘅係，寮屋區只要一發生火災，就一發不可收搭。1953年石硤尾寮屋區大火，就令近五萬人無家可歸。

石硤尾寮屋區大火之後，港英政府就決定大規模興建公屋，解決基層市民住屋需要。能夠上公屋就成為寮屋居民嘅心願。到咗八十年代初，俗稱「寮仔部」嘅寮屋管制組開始向寮屋同住戶登記，有檔案紀錄嘅寮屋會獲發臨時屋牌照，而政府亦開始逐步清拆寮屋區。不過，大家唔好以為今時今日無寮屋，資料話香港仍有8萬幾間寮屋。

圖片來源：香港討論區