上個禮拜講到張衛健因為拍《西遊記》續集嘅片酬同TVB傾唔埋，仲被高層嘲諷話如果佢塊面無毛嘅話根本就唔值錢，今日就再講多少少張衛健嘅故事。

做得演員，風光背後少不免承受苦難。張衛健曾經遇過事業低潮，成年幾都無工開，全身上下得返最後嘅5000蚊港紙。就喺果陣，佢收到台灣一家好細嘅唱片公司打嚟同佢傾合作。張衛健梗係即刻應承，用1500蚊買咗張來回台北嘅機票，用2500蚊訂咗台北最貴酒店嘅豪華套房，最後1000蚊用嚟租咗一架Benz由機場送佢去酒店，展示大明星派頭。點知一落機，間唱片公司打嚟話今日無人得閒去機場接佢，要改喺夜晚10點先同佢見面傾合作。

雖然張衛健果1000蚊租車費凍過水，但佢夜晚叫咗5杯咖啡同2包煙，再搣開包糖攪兩攪、點著支煙再整熄等，扮到啱啱有人到訪咁款，再同嚟傾合作嘅人講，自己啱啱先同環球唱片嘅人傾完。唱片公司嘅人見張衛健咁搶手，合作事宜梗係嗱嗱林傾掂咗。就係咁，張衛健利用僅餘嘅身家，搏到一個機會，三個月之後，張衛健嘅第一張國語專輯《夢中情人》喺台灣發行，仲賣出20萬張，瞬間爆紅。

而張衛健北上發展之後，喺1999年接咗《少年英雄方世玉》呢套戲，塑造咗一個機靈聰敏但成日闖禍嘅方世玉之後，即刻紅遍兩岸三地。2001年，張衛健出演改編自武俠小說家金庸作品《鹿鼎記》嘅《小寶與康熙》，飾演韋小寶，佢嘅經典對白「涼風有信，秋月無邊，虧我思嬌嘅情緒好比度日如年，雖則我唔係玉樹臨風，瀟灑倜儻，但我有廣闊既胸襟，加強勁既臂彎」相信到宜家都仲有好多人識背。就係咁，佢用演技再一次證明：「我的臉上一根毛都沒有，我還是可以爬回去的。」

圖為《夢中情人》唱片封面及《小寶與康熙》劇照。網上圖片