太平戲院：見證塘西繁華

香港以前一間好出名嘅戲院，叫太平戲院，阿史覺得值得同史友們分享下。

阿史估計史友都應該未必去過呢間戲院，因為呢間响1981年就關門大吉，後嚟仲拆埋起樓。太平戲院十九世紀末開始立足娛樂繁華之地石塘咀，响利舞台落成之前曾經亦係全港最大、規格最高嘅戲院，早期係上演粵劇，戲院於1932年重建，添置有聲放映機同銀幕，令呢間粵劇戲院兼具電影院功能。唔少名伶同頂級戲班都响度表演過，好似馬師曾領班組成太平劇團，譚蘭卿、梅蘭芳等本地同中國各地名伶都响度表演過。另一樣特別嘅係戲院見證港島西區一帶塘西風月嘅興衰。據講，二三十年代响塘西一帶賣身嘅妓女，賺到錢之後就會去戲院捧戲子嘅場，當時有所謂「男溫女，女溫伶」，就係形容啲公子哥兒响妓院揮金如土，而妓兒賺到佢哋錢之後又去戲院揮霍。

不過，隨著西環一帶經濟衰落，加上粵劇於1960年代末陷入低潮、電視普及、戲院行業競爭激烈等因素，太平戲院最終响1981年停業，之後拆埋起樓，依家去到舊址應該見唔到任何太平戲院昔日輝煌嘅痕跡。