唔知大家屋企有無虎標萬金油看吓門口咁呢？阿史間唔中被蚊咬都係搽佢止痕去腫，有時肚痛又係用佢，都真係幾萬用。唔知年輕一代又識唔識，原來星系報業嘅創辦人胡文虎就係「萬金油大王」？

胡文虎祖籍福建省永定縣，生於緬甸仰光，佢嘅父親早年喺仰光創辦專門行醫賣藥嘅永安堂。胡文虎同細佬胡文豹大個之後決心將永安堂發揚廣大，1908年，胡氏兄弟將祖傳嘅「玉樹神散」秘方改良，創製成既可以外塗內服，攜帶方便、價錢便宜嘅萬金油。胡氏兄弟又設計咗老虎商標嚟包裝，老虎唔單止代表藥力強勁，同時又代表係胡文虎嘅傑作。萬金油係虎標最暢銷嘅產品，暢銷鄰近嘅新加坡、馬來西亞等地。1932年，胡氏兄弟將永安堂總部搬去香港，又喺內地設廠房同分銷商，打開咗中港、東南亞市場，兩兄弟後嚟憑住虎標驕人嘅銷售額，成為東南亞首富。

除咗虎標本身嘅藥效之外，胡文虎識得利用包裝同「賣廣告」嚟宣傳自家產品，都係虎標暢銷嘅主要原因。喺以前資訊無咁發達嘅年代，文字同霓虹燈廣告係主要嘅宣傳途徑，胡文虎就專門請文人幫虎標寫廣告稿、小品，印喺宣傳單張、海報、冊子上面，又利用霓虹燈落重本大賣廣告。胡文虎仲喺車廠特別訂做咗一架車，將車頭燈做成老虎眼，令喇叭聲好像老虎叫聲咁。然後，再召集夥計著住虎標服裝或者扮成老虎，邊開車邊打鑼敲鼓奏樂，好似飄色巡遊咁喺條街度宣傳。而胡文虎創辦嘅星系報業，更加成為虎標賣廣告嘅重要平台，咁有生意頭腦，真係抵佢發嘅。過兩日同大家講講同樣好出名嘅虎豹別墅。

原圖嚟自網絡。