最近有位朋友啱啱去完幾個月旅行返香港，佢嘅旅程大概係去咗中東、中亞一帶。阿史就問佢有乜得意事，佢話比較難忘係响旅程食咗好多香港好少機會食嘅嘢，其中一樣就係馬肉。
响現今世界，唔少國家嘅主流肉食都離唔開豬牛羊。不過，响中亞就好流行食馬肉。其實都唔難理解，因為中亞地區盛產馬匹，所以响當地馬匹唔單止俾人騎，仲成為當地人嘅肉食來源之一。除咗馬肉，中亞地區仲流行做「馬腸」，「馬腸」其實係將馬肉塞入馬嘅大腸裡面再薰製而成，哈薩克人就慣以「馬腸」為過冬食物。時至今日，馬肉來源已經唔係來自野生馬匹，而係來自人工飼養嘅馬匹。唔講唔知，雖然流行食馬肉嘅地方係中亞，但全球生產馬肉最多嘅國家係中國。
講返轉頭，點解友人話食馬肉難忘，因為佢食嘅係馬肉刺身。