講起出名嘅武俠小說作家，梁羽生嘅名聲或者不如金庸、古龍，不過梁羽生嘅處女作面世比另外兩位都要早，所以梁羽生又被稱為「新派武俠小說的開山鼻祖」。佢於十年前嘅今日逝世，揮別江湖，一於同大家回顧佢嘅傳奇人生。

梁羽生原名陳文統，生於廣西省蒙山縣，自5歲起已經開始背誦唐詩三百首，閱讀《古文觀止》一類嘅文言文。1949年，梁羽生由廣州嶺南大學（現已合併入中山大學）畢業之後，就入咗香港《大公報》任翻譯一職，後嚟任副刊編輯，之後先調任《新晚報》做編輯。至於梁羽生寫武俠小說嘅契機，其實係源於一場比武。

1954年1月17號，香港白鶴派掌門人陳克夫同太極派掌門人吳公儀都話自己派嘅武功最好。口同鼻拗點算？最後簽生死狀嚟個擂台比武。當時香港嚴禁私鬥，於是擂台移師澳門，點知只係用咗3分鐘，吳公儀一拳就打到陳克夫不停咁流鼻血，不過大會最終都係裁決打和。呢單新聞轟動一時，《新晚報》嘅總編輯羅孚就叫梁羽生食住嗰勢寫篇武俠小說，梁羽生一嚟覺得武俠小說「唔入流」，二嚟佢未試過寫，所以一口拒絕。羅孚就勸佢話：「入不入流係你自己寫的，你要入流就可以入流。」梁羽生仲係好抗拒，羅孚於是嚟個先斬後奏，先喺報紙登個預告，話聽日開始連載，最終逼梁羽生走上武俠小說作家嘅道路。

梁羽生鍾意睇武俠小說，尤其喜愛白羽嘅作品，梁羽生臨危受命上陣，無可奈何之下唯有以白羽為師，改咗個筆名。據講梁羽生筆名以「梁」為姓，係因為南北朝時期嘅南朝順序為「宋、齊、梁、陳」，「梁」喺「陳」之前，故以「繼承梁陳文統」自勉。梁羽生嘅武俠處女作、以陳吳擂台比武為靈感嘅《龍虎鬥京華》就係咁被逼面世，「梁羽生」嘅大名之後喺武俠小說界大放異彩，留低咗《雲海玉弓緣》、《白髮魔女傳》、《萍蹤俠影錄》等經典作品。

圖為梁羽生及《白髮魔女傳》劇照。