上次講起日軍喺九一八事變之後，佔領咗中國東北三省，遭到以國際聯盟為首嘅國際社會普遍反對，日軍其後試圖轉移視線，竟然喺1932年1月28日策劃一·二八事變。當晚日軍以「日本僧侶被毆」為由，進攻上海閘北，駐守當地嘅第十九路軍喺總指揮蔣光鼐、軍長蔡廷鍇指揮下作出抵抗。國民政府調派第五路軍參戰，喺第十九路軍同第五路軍並肩作戰之下，日軍傷亡超過1萬人。

國民政府認為當時中國軍閥割據內亂、軍令政令唔統一、財政極端困難，所以就希望以最少代表同日本傾停戰。喺5月5日，國民政府代表郭泰祺同日本特命全權公使重光葵，代表中日雙方簽訂《淞滬停戰協定》，簽字日起停戰，中方取締所有抗日活動，第十九路軍留駐停戰線，並將上海劃為非武裝區，中國唔可以喺上海至蘇州、昆山一帶駐軍，而日軍就要撤退到一二八事變前嘅位置。

事變發生後，國民政府行政院長汪精衛、軍事委員會委員長蔣介石等人，就以紅軍發動贛州戰役等原因，確立「攘外必先安內」嘅政策。而日本亦趁住國際調停戰火嘅空檔，扶植出傀儡政權偽滿洲國。

原圖取自網絡。