上個禮拜阿史啱啱同大家講過一單撞鬼撞到上報紙嘅鬼故，今晚再講多另一單同樣鬧到上報嘅鬼故，而今次撞鬼嘅對象唔係普通人，而係警察。

1966年11月18號，《工商日報》報道過有警察撞鬼，嚇到要辭職嘅新聞，事件轟動一時。話說一名駐守灣仔峽警署（即係宜家警察博物館）嘅張姓警員，喺山頂一帶中峽道巡邏果陣，見到個著住中式女傭服飾嘅女仔踎喺路邊石壆，好似喺度喊緊咁。夜媽媽一個女仔喺路邊喊，張sir覺得奇怪，於是上前查問。點知個女仔抬頭一望，張sir被嚇到成身震晒！佢見到個女仔披頭散髮，面青青兼發緊紫，最恐怖係七孔流血，仲怒啤住佢。面對咁嘅鬼樣，張sir連警帽跌咗落地下都唔理，即刻調轉頭飛奔返警署。

張sir返到警署之後，過咗成個鐘都驚到講唔到嘢，後嚟一開口就不停大叫：「唔關我事！」佢成個身體震曬，慢慢同同事講返事件始末。當晚有其他同事話陪同佢返原地調查，據講張sir起初好抗拒，但知道一齊去嘅醫務總監成日劏屍，好可能「百毒不侵」，先肯半推半就返現場。不過，第二次去現場並無發現。報道話呢次事件之後，警署將附近地區嘅單咇巡邏編制改為孖咇制。事後，雖然處長同意張sir唔洗再守灣仔峽警署，但事發一個月之後，佢都係辭職收場。

原圖嚟自網絡。