香港有間停辦咗超過20年嘅學校被傳好猛鬼，猛到响2013年被美國《國家地理頻道》選為亞洲十大恐怖地點之一，呢間學校究竟喺邊？叫咩名？佢就係元朗屏山嘅達德學校。

達德學校喺1931年創校，直至1998年收生不足停辦。學校外圍有墓穴，村民話果啲係鄧氏先祖嘅墳墓，附近仲有個供屏山村民出殯用嘅孝思堂。由於學校荒廢得太耐，連學校名都被植物覆蓋，日頭去都覺得陰森恐怖，令呢度成為著名嘅靈探熱點。《國家地理頻道》採訪過之前喺達德學校玩過war game嘅一位中學老師，佢話當時成班人夜晚喺度玩嘅時候，見到個著住白衫嘅男人踎喺度好似執緊嘢咁，但當佢哋走過去睇睇，個男人就唔見咗。

2011年，有12個初中生去達德學校度靈探，期間有個女仔突然大嗌，話見到有個紅衣長髮女人伏咗喺墳頭對出嘅空地，同行人士雖然望過去乜都見唔到，但已經覺得好心寒，仲被嚇到齊齊拔足狂奔。直到跑咗30分鐘，一行人先停低，就係呢個時候，頭先話見到紅衣女人嘅女仔情緒突然變得好激動，手舞足蹈兼大叫之餘，仲大力捏住自己條頸。同行嘅男仔即刻阻止佢自殘，點知反被個女仔狂咬、抓傷，最後竟然要幾人合力先將個女仔制服。

傳聞話曾有村民喺達德抵抗日軍被殺，屍體就葬喺山邊，令達德變成亂葬崗，又有傳言話有女校長喺男廁吊頸，更加有傳聞指呢度曾被用嚟做監獄。不過有達德學校嘅校友澄清，自殺傳聞嘅主角唔係女校長，而係校長個老婆，而且佢係喺屋企自殺。校友仲話，監獄嘅傳說其實係個誤會，因為達德經常被借用嚟做片場，所以果啲疑似監獄嘅設施其實係人哋拍戲留低嘅。

原圖嚟自網絡。