今日同大家講講李兆基，唔好搞錯，唔係講緊地產界四叔，而係講緊影壇「四大惡人」之一嘅演員李兆基。最近有報道話佢月頭做手術，成功切除腫瘤，目前休養緊。

叫得做「四大惡人」，外形自然要有霸氣，唔睇得都嚇得咁款。凶神惡煞嘅李兆基未入娛樂圈之前，係個名副其實嘅古惑仔，偷車、打劫、吸毒瓣瓣齊，搞到屋企人疏遠佢。後嚟李兆基痛改前非，戒毒後加入娛樂圈，編劇、演員、顧問都做過。李兆基拍過唔少經典作品，好似電影《古惑仔》、《喜劇之王》、《算死草》、《慈雲山十三太保》等。

至於阿史最中意嘅演出，不得不數李兆基响《食神》扮演嘅鵝頭，有幕講佢試食爆漿瀨尿牛丸，搞到出現海邊跳舞嘅幻覺兼發曬姣，再配埋佢變得勁溫柔嘅聲線，同外形嘅反差超大，再整多兩句李白詩，九唔搭八之餘又好爆笑。

李兆基當年响電影界好風光，不過後嚟佢同人夾份開足浴店，被呃幾十萬，血本無歸，加上投資物業蝕錢，導致近年生活麻麻地。唔少圈內人都好有義氣，好似李兆基有次食飯撞到周潤發，發哥幫手埋單，而李兆基出院後，古天樂等都有慰問佢。點都好，希望大家新一年都身體健康。

原圖嚟自網絡。