唔好以為阿史同泰國有仇，因為呢句說話唔係阿史講，而係香港商人胡應湘講嘅。佢有呢個諗法，係同佢九十年代一個响泰國嘅投資項目有關。

話說，上世紀九十年代初，胡應湘嘅公司香港合和實業公司攞到價值40億美元嘅「曼谷高架公路及鐵路」交通項目。根據合約，首三期工程需要响1998年即曼谷亞運前完成。點知，呢單「大刁」就成為咗胡應湘嘅惡夢。當地政府遲遲都收唔到地，搞到工程延誤，最慘就係撞正亞洲金融風暴，泰銖大幅貶值，結果項目爛尾收場。合和好無奈咁响1998年為呢項工程撇賬五十億元，蝕到喊嘅胡應湘對呢次教訓講咗句：「奉勸世人，去泰國最多做遊客好。」

不過咁，响泰國出世、曾經活躍於香港商界嘅商人黃創山，就响曼谷興建空中捷運系統搞到風生水起。黃創山就話，胡應湘輸在唔了解泰國呢個地方，好似「曼谷高架公路及鐵路」項目大多响市郊地區，根本無利可圖。