也門响七世紀開始成為阿拉伯帝國嘅一部份，後嚟就成為鄂圖曼帝國嘅領土。由於也門呢個地方係扼守住紅海出入印度洋嘅曼德海峽，加上係西方國家航行去印度嘅中途站，所以呢個地方多年嚟都係兵家必爭之地。無論係鄂圖曼、葡萄牙、英國，都想霸到呢個地方。响1918年，鄂圖曼帝圖覆亡，也門得以獨立。而英國就响1934年同也門政府簽約條約，將也門南部劃為保護地，亦成為日後南北也門分離同對立嘅原點。

到咗六十年代，也門出現革命，原來王朝被推翻，建立咗阿拉伯也門共和國，概念上就係北也門。而响1967年，英國撤出南部保護地，成為咗後嚟嘅也門民主人民共和國，亦即係南也門。不幸嘅係，南北也門就好似朝鮮半島咁，一邊係奉行親蘇聯的社會主義，一邊就奉行親西方嘅資本主義，成為美蘇冷戰時代响中東嘅較勁場地。

响冷戰末期，奉行社會主義南也門應世界潮流，同也門傾統一，兩國終於响1990統一為也門。不過，好日子唔係好長，南北也門响1994年爆發內戰，戰事維持咗七個月，原來嘅南也門勢力輸咗，也門再度統一。之但係，也門統一咗，但國內各派勢力都不安於現狀，形成咗到今日仍然混亂嘅局面。好似也門國內其中一個反政府勢力胡塞武裝組織，多年嚟同政府軍打生打死，而胡塞武裝同也門政府軍背後，就涉及什葉派同遜尼派之間嘅鬥爭，即係關係到沙特阿拉伯同伊朗。另外，伊斯蘭國同阿爾蓋達呢類恐怖組織响也門發動過唔少恐怖襲擊，都真係幾混亂下。

雖然也門係世界上最貧窮嘅國家之一，不過，有危先有機，呢個地方可能係世界各地實業家嘅冒險樂園都未頂。