今次阿史想介紹嘅，就係亞洲十個最貧窮嘅國家之一孟加拉。孟加拉呢個名香港人應該係聽得多而知得唔多。孟加拉係南亞國家，東、西、北三面同印度毗鄰，南面濱臨孟加拉灣，係南亞地區中人口第三多嘅國家。其實响古代孟加拉地區同中國已經有密切往來，好早之前介紹過，明朝時有個榜葛剌嘅國家進貢咗隻「麒麟」，榜葛剌就係位於孟加拉喇！

同其他南亞國家一樣，孟加拉人嘅命運隨著英國人東來而改變。孟加拉地區响18世紀中葉開始成為英國嘅殖民地，加爾各答成為咗英屬印度首都。同清代情況類似，西方文化同當地本身文化之間有好多矛盾，有人唔習慣選擇抗拒，亦有人嘗試將兩者結合。當時有一個叫羅姆‧摩罕‧羅易。佢係印度近代嘅啟蒙思想家，佢响1828年創立「梵社」，致力將孟加拉地區嘅人從種姓、階級、迷信同專制，導向科學、民主方面發展，响當時形成咗一股重要思潮，亦刺激咗孟加拉地區以至印度嘅知識份子對自身文化嘅重新思考。呢股通過西方文化嚟令印度文化從中世紀帶進現代嘅思潮，後世人稱之為「孟加拉文藝復興」。

孟加拉文藝復興帶嚟咗兩個重要影響：第一，就係印度文化同西方文化接軌。另外就係當時唔少知識份子受到呢種思潮影響形成咗青年孟加拉派，亦係最早民族主義潮流。跟著嘅，就係印度地區嘅民眾爭取脫離英國殖民統治嘅開始。