唔知大家有無行過或者去過中環嘅楊耀記？楊耀記係孫中山同反清「四大寇」嘅聚所，亦都係「四大寇」之一嘅楊鶴齡父親所經營嘅建築行。楊鶴齡雖然係同盟會最早嘅成員之一，但佢嘅事蹟就唔係咁為人所知，究竟中間有咩故仔？

生於澳門嘅楊鶴齡原籍廣東中山，祖屋喺孫中山故居隔離，兩人自細玩到大。後嚟楊鶴齡喺廣州算學館學成之後，去香港跟父親經營楊耀記建築行。楊耀記同孫中山當時就讀嘅香港西醫學院相距不遠，孫中山課餘周不時都會去楊耀記搵楊鶴齡聚舊，再加上尢列同陳少白，四人經常喺楊耀記高談闊論，旁若無人。四人特別仰慕太平天國洪秀全嘅事蹟，並以反清為己任，更加响1888年上楊耀記天台，齊齊著到好正式，燒黃紙表示決心，此後被稱為「四大寇」。

楊鶴齡立志反清，加入咗興中會，雖然無好似其他成員咁積極參與革命活動，但就對籌措革命經費方面貢獻良多。喺1892到1894年間，楊鶴齡變賣祖業，資助孫中山喺澳門、廣州開設藥店，自己又奔走港澳籌募經費支持起義。楊鶴齡父親去世之後，留咗一筆不菲嘅產業，呢筆遺產隨後被楊鶴齡相繼變賣，成為孫中山搞革命活動、購買軍需用品嘅經費。據楊鶴齡兒子楊國鏗回憶話，當時爸爸喺同盟會並唔活躍嘅最大原因，係因為佢要混入煙館等地秘密宣傳革命活動，搜集情報之外仲要同分會等各方面密切聯繫，最終染上吸鴉片嘅惡習。直至後嚟孫中山逝世，楊鶴齡先戒咗煙癮，逐漸變返健康。

原圖嚟自網絡。