之前阿史介紹土耳其嘅時候，有史友就留言話土耳其人自認為突厥人後裔，情況同匈牙利人認為係匈奴後裔類似，咁今個星期自然要講下匈牙利。

匈牙利係位於歐洲中部嘅內陸國家，中國史書記載嘅匈奴就係响依家蒙古至中亞一帶嘅外族，咁兩者係咪有關係呢？先講講匈奴嘅歷史，匈奴呢個遊牧古國，史書最早記載於戰國時期，秦漢時代匈奴一直係中原政權嘅邊疆之患。到咗晉代，五胡亂華，當中就有匈奴份。但其實，早响漢代個陣，匈奴內部已經出現咗分裂，分為北匈奴同南匈奴，雙方係相處對敵狀態。而北匈奴其中一部分族人，就响公元二世紀個陣西遷，相傳去咗中亞一帶定居。

而响三至四世紀左右，有一個民族响歐亞大陸崛起，史稱為匈人。匈人曾經响五世紀出現一個強人領袖，佢就係「上帝之鞭」阿提拉，佢建立嘅匈人帝國國力強大，仲曾經多次率領大軍入侵東羅馬帝國同西羅馬帝國，不過响五世紀末時，匈人帝國逐漸瓦解並從歷史消失。有人就認為，匈人帝國消失，但匈人並無完全消失，亦成為後嚟嘅匈牙利人。

講到呢度，似乎匈牙利人真係好似匈奴後裔咁喎。不過，到現時為止都未有足夠證據證明匈牙利人就係匈奴後裔，因為匈奴同匈人係咪同一種族都今時今日都係有爭議。有意見就話，北匈奴西遷同三百年後歐洲出現嘅匈人，時間同地點位置都吻合，似乎講得通。但亦有意見認為，匈牙利人本身應該係東方遊牧民族馬扎爾人，來自歐亞大陸交界地帶嘅烏拉山，所以佢哋同匈奴根本無關係。

今時今日，雖然有匈牙利人認為自己係匈奴後裔，不過匈牙利官方就唔承認有匈奴族。