參與「一帶一路」計劃嘅國家當中有唔少係歐洲已發展國家，包括今次阿史介紹嘅愛沙尼亞。愛沙尼亞係波羅的海三國之一，係歐洲其中一個科技水平最高嘅國家之一。不過咁，阿史今次就唔係介紹愛沙尼亞有幾勁，而係介紹下呢個國家响二戰時嘅悲慘歷史。

愛沙尼亞位於波羅的海地區，愛沙尼亞响18世紀被俄羅斯吞併，俄國十月革命之後獨立，後嚟蘇俄政府响1920年同愛沙尼亞簽署《塔爾圖和約》，蘇俄承認愛沙尼亞嘅主權獨立。之不過，响三十年代，蘇聯同納粹德國就秘密簽署咗《蘇德互不侵犯條約》，將波蘭同波羅的海三國瓜分咗，即係蘇德响呢啲地區有默契咁擴張勢力範圍。就係咁，蘇聯就响1940年入侵波羅的海，愛沙尼亞、拉脫維亞同立陶宛就成為蘇聯嘅一部分。

後嚟，納粹德國响1941年6月撕毀《蘇德互不侵犯條約》，對蘇聯宣戰，代號為巴巴羅薩行動，愛沙尼亞被納粹德國佔領。初時愛沙尼亞人認為德軍嚟到驅走咗蘇聯，係解放咗佢哋。點知後尾發覺，納粹德國原來唔係幫佢哋恢復主權，只係另一個佔領者咁解，而且德國本身係有計劃想將波羅的海三國嘅人遷去東部佔領區。

另一方面，蘇聯慢慢企穩陣腳，响德國進行反攻，塔林、納爾瓦等城市成為紅軍空襲目標，造成大量百姓傷亡。此外，由於愛沙尼亞人同納粹德國合作，所以當蘇聯重新佔領愛沙尼亞之後，就响當地進行大規模逮捕同處決愛沙尼亞人，部分愛沙尼亞人亦被流放到西伯利亞，又遷入咗好多俄羅斯人入去定居。

阿史幾年前去過一次愛沙尼亞，當地就有個戰爭紀念館介紹呢段歷史。至於點解阿史要介紹愛沙尼亞呢？因為今日係愛沙尼亞脫離蘇聯，宣布恢復獨立嘅25周年紀念。