喺香港，就算唔係粵劇迷，都一定聽過知名粵劇藝術家白雪仙個名。白雪仙對粵劇嘅造詣有幾高，自然唔駛多講，原來佢爸爸白駒榮都好犀利，唔單止有「小生王」稱號，仲曾經係粵劇界嘅四大天王之一，即使後嚟雙目失明，依然無損佢嘅專業演出，繼續於舞台上發光發熱。

白駒榮原名陳榮，係順德人，19歲就學戲，曾經得到粵劇界前輩周瑜林、千里駒指點，令白駒榮嘅技藝大有進步，後嚟仲成為省港名班嘅台柱。20年代初果陣，白駒榮憑《再生緣》嘅皇帝一角成名，之後喺《金生挑盒》大膽用真嗓唱廣東方言，一改以往小生演唱用假嗓嘅唱法，弘揚咗「平喉」唱腔。

白駒榮嘅嗓音清越、行腔圓潤自然，加上做功瀟灑、生動傳神，形成獨特嘅「白派」。可惜喺1946年，佢因為視神經萎縮導致雙目失明。為咗再踏舞台，佢不惜經過多番苦練，每去到一個新嘅地方，白駒榮都會喺弟子嘅陪同下親自上台行一次，默默記住由台側行上台、行到台中間係幾多步。而佢喺台上嘅走位就靠黐喺台上嘅竹片嚟定位，只要一踩到竹片，就係一道警戒線，提醒白駒榮唔能夠再向前。試過有一次，飾演僕人嘅演員大意，將酒壺嘅壺嘴位置調轉咗，白駒榮一摸發現同平時唔同，再加上拍檔嘅反應有異，於是極速執生，臨時加啲動作、台詞，先將觀眾嘅視線轉移，再偷偷擺返好酒壺嘅位置。咁專業嘅表現，唔知情嘅人，幾乎睇唔出白駒榮原嚟係個「盲人老倌」。

資料嚟自《文化·傳承》順德篇，原圖嚟自網絡。