英國著名物理學家霍金去年離世，終年76歲，阿史記得早幾年睇咗霍金套傳記電影《霍金：愛的方程式》（The Theory of Everything），認識到霍金學術以外嘅另一面。身為著名物理學家，霍金對於複雜嘅科學、浩瀚嘅宇宙都有深刻理解，不過有一個問題連佢都諗唔明，依個謎團就係女人。

霍金一生經歷過兩段婚姻，但可惜都係觸礁收場。回想霍金第一段婚姻，21歲嘅佢仲係健健康康、籍籍無名嘅時候就認識咗Jane，佢兩個拍拖無幾耐，霍金就確診患上俗稱「漸凍人症」嘅運動神經元疾病，當時醫生估計霍金得返2至3年命，但Jane依然對霍金不離不棄。霍金病情惡化速度比預期慢，1965年就同Jane拉埋天窗，仲先後生咗3個仔女。

Jane照顧咗霍金二十幾年之後，據講受到太大壓力，而霍金嘅脾氣亦變得越來越古怪，仲開始同看護Elaine發展感情。二十年嘅婚姻，經得起疾病，卻經不起時間嘅考驗，Jane同霍金喺1990年分居，五年後年離婚。無幾耐，霍金就同Elaine結婚，但之後有傳Elaine虐打霍金，最終霍金喺2006年申請離婚。先後經歷唔完滿婚姻嘅霍金曾經被問到，平日思考最多嘅係乜嘢，霍金答係女人，因為「佢哋永遠係解唔開嘅謎」。

圖片為霍金兩次結婚嘅相，取自網絡。