作為一個擁有171年歷史嘅跨國企業，或者大家無用過佢嘅產品，但一定都有聽過佢嘅名，佢就係西門子。西門子係德國一間以電子同電機產品為主嘅公司，同時活躍喺能源、醫療、工業、基礎建設同城市業務等領域，今日一於同大家介紹創辦人西門子嘅創業同管理秘笈。

西門子出生喺德國一個普通嘅農民家庭，喺學校嘅成績好標青，但就無錢讀上去，於是加入咗普魯士軍隊「曲綫求學」。西門子喺軍隊好順利咁做咗軍官，佢唔單止可以免費學到知識，仲有時間研究佢嘅小發明。1847年，西門子同合夥人創辦西門子哈爾斯克電報機製造廠，後嚟合夥人退出先改名做西門子公司。不過，公司成立之初欠缺資金，加上公司嘅最大客戶——普魯士軍隊對電報興趣乏乏，西門子公司要生產水錶、鐵路警鐘等產品嚟維持經營。幾番波折之後，西門子公司終於上咗軌道，喺歐洲各國聲名大噪。

西門子雖然係靠科學技術起家，但佢對於管理自己公司亦有一套方法。為咗令員工有愉快嘅工作環境，西門子引進咗好多超前嘅福利制度，例如：1872年係公司實施退休金同撫恤金制度，甚至早過德國「鐵血宰相」俾斯麥建立嘅保險制度；喺當時普遍工時長達10-12個鐘果陣，已經實行9小時工作制，隨後仲縮短到8.5小時；實行利潤分享方案，即係宜家嘅股權分紅；西門子仲喺旅遊聖地興建公司度假村，俾員工度假之用……種種創新福利制度都大大領先於好多歐洲公司。後嚟，西門子過身之後，佢嘅女兒更建立屬於員工子女嘅「兒童之家」，仲推動心理諮詢同關愛女性員工嘅制度。

圖為創辦人西門子及德國西門子公司。網上圖片