吉爾吉斯呢個國家對香港人而言可能會有啲陌生，其實呢個國家係中國嘅「鄰居」，亦係中國近年响外交上積極拉攏嘅中亞國家之一。

古代嘅吉爾吉斯地區，好早就响中國史籍中有記載，好似《史記‧匈奴列傳》記載嘅鬲昆就係古代呢個地區嘅名稱。唔講得太遠，响19世紀，俄國成功將依家嘅吉爾吉斯納入版圖。十月革命之後幾年，即係1926年，吉爾吉斯成立共和國，成為蘇聯加盟國之一。 

1991年，吉爾吉斯脫離蘇聯獨立，不過，獨立後嘅吉爾吉斯雖然實行民主制度，但受到經濟不景同政治貪污腐敗等因素影響，國民生活都唔算太好。响2005年，吉爾吉斯就爆發咗場鬱金香革命，迫使做咗十幾年總統嘅阿卡耶夫落台，結果阿卡耶夫辭職。之後總理巴基耶夫响2005年大選中贏咗成為新任總統，仲响2009年成功連任。

點知，吉爾吉斯响2010年爆發第二次「鬱金香革命」，當時，政府關閉多間國內媒體，封鎖消息，示威者同警察爆發大規模衝突，最終釀成86人死亡。結果親俄嘅社會民主黨兩日組成臨時政府，推翻總統巴基耶夫。當時就有國外媒體認為，呢兩次顏色革命背後都係有美國支持。

今日嘅吉爾吉斯，响政治同經濟上主要係响俄羅斯同中國靠攏，特別係近年中國同吉爾吉斯發展雙邊貿易愈來愈興旺，已成為吉爾吉斯第二大貿易夥伴。至於吉爾吉斯能唔能夠依靠中俄呢兩個亞洲強國擺脫貧窮呢？真係要拭目以待。