香港八九十後相信對啟德機場呢個名唔會陌生，咁究竟呢個名點嚟？原嚟啟德機場嘅前身係啟德濱，「啟」嚟自何啟爵士，「德」就係企業家區德，阿史今日要同大家講講第一位被封為爵士嘅華人何啟。

何啟祖籍南海縣西樵村，佢生於一個香港西化家庭，自幼接受西方教育，曾入讀宜家嘅皇仁書院。何啟年僅13歲就遠赴英國讀醫，仲喺英國識咗第一任太太雅麗氏。雅麗氏出身英國貴族名門，佢勸當時已經拎到內科學士、外科碩士學位嘅何啟讀法律，因為喺英國，法學院被視為培養貴族嘅搖籃。何啟亦聽從太太嘅勸告，入咗位居英國四大法學院之首嘅倫敦林肯法學院。

後嚟何氏夫婦一齊返香港，何啟仲成為香港歷史上嘅第一位西醫，開始掛牌行醫。不過當時香港人普遍唔相信西醫，令何啟嘅醫生生涯早早結束，於是佢轉做律師，仲開始接觸房地產生意。不幸嘅係，雅麗氏生咗個女之後就一病不起，最終撒手人寰。太太嘅過身對何啟嘅打擊好大，為咗紀念亡妻同向大眾傳播西醫學，何啟創辦咗雅麗氏醫院。雅麗氏醫院後來同何啟姐姐何妙齡嘅醫院、那打素醫院合併，改名為「雅麗氏何妙齡那打素醫院」。

除咗創立西醫醫院之外，何啟仲參與創辦香港西醫書院，即係香港大學醫學院嘅前身。自此，香港乃至整個東亞有咗第一所西醫書院。何啟仲親自擔任教授，講授法醫學、生理學近20年，佢嘅學生當中最出名嘅就係孫中山。

圖為何啟同雅麗氏及那打素醫院，原圖嚟自香港大學雅麗氏何妙齡那打素慈善基金會網站及網絡。