烏茲別克係中亞一個國家，呢個地區歷史上曾經係花剌子模、蒙古帝國、俄羅斯帝國等嘅領土。响二十世紀初，烏茲別克立國，仲加入埋蘇聯。而卡里莫夫就係响蘇聯統治時代出身，响1989年成為烏茲別克共產黨中央委員會第一書記。1991年，蘇聯瓦解，烏茲別克獨立，實行民主體制，而卡里莫夫就响烏茲別克獨立後第一屆總統大選中贏咗，成為總統。

雖然烏茲別克推行民主選舉體制，之但係卡里莫夫又能夠做足廿幾年總統，唔係因為佢能力超強，而係佢响國內係實行極權統治，例如打壓國內反政府力量，挾制新聞、言論自由、打壓異己，响多次總統大選舞弊令佢能夠連任再連任。另外，烏茲別克近九成人口係穆斯林，卡里莫夫鐵腕遏制穆斯林，信眾要獲政府批准先可以去清真寺祈禱。所以，咁多年嚟烏茲別克人權狀況都俾西方國家批評得好勁。

除咗人權，响卡里莫夫統治之下，烏茲別克貧富懸殊問題嚴重。烏茲別克國內擁有石油、天然氣與金礦，又係棉花生產大國。不過，烏茲別克嘅國家財富就集中咗响班政商權貴手中，包括卡里莫夫家族，好多烏茲別克國民相當貧窮，仲要外流到他國搵工做。

隨住卡里莫夫離世，烏茲別克國內政治會唔會出現動盪呢？卡里莫夫生前力推中國「一帶一路」策略，新任總統又會唔會跟隨呢？呢啲都係外界所關注。