澳門娛樂事業發展蓬勃，講起「澳門賭王」，大家可能會率先諗起起富豪何鴻燊，但要數濠江第一代賭王，就不得不提盧九。佢最先將博彩業經營引入澳門，而盧家更成為當時澳門舉足輕重嘅名門大族。

盧九原名盧華紹，廣東新會人，生於1848年，十歲左右到澳門生活。雖然佢喺家中排行第三，但細個嘅時候被人改花名叫佢「大頭耇」，耇同九同音，於是漸漸被稱為「盧九」。有學者就話，盧九早年應該係透過賣豬肉嚟賺取「第一桶金」。當時，澳葡政府响澳門實行「承允制度」，無論係咩行業都要投標承辦，而盧九本身喺街市賣豬肉，後來同人合作攞到澳門嘅豬肉專營權，長期壟斷豬肉生意，成為澳門嘅豬肉大王。

盧九又曾經做過錢銀找換，之後創辦「寶行錢號」，並開設經營澳門白鴿票嘅「宏豐公司」，賺到盤滿缽滿，成為澳門第一代賭王兼華人代表，亦是澳門大富商之一。盧九極具生意頭腦，專登將賭場開喺人山人海、交通方便嘅酒店內，再搵嚟粵劇優伶到場表演，又派豪華客輪接載廣東嘅賭客到澳門賭錢。佢後來再同港澳商人合夥，將賭業版圖擴展到廣東。

發跡之後，盧九熱心公益事業，多年來捐辦義學，又曾向澳門鏡湖醫院、同善堂捐獻，為內地嚴重災害出一分力，1890年更獲葡王授予騎士勳章。但後來清廷政策有變，令盧九經營嘅業務一蹶不振，負債纍纍，佢最後走上自殺末路。

背景圖為盧家大屋，取自網絡。