六十幾年前嘅一場空難，牽扯出一個個政治漩渦。1955年4月11日，印度航空包機「喀什米爾公主號」喺高空爆炸墮海，除咗3名機組人員喺海上漂流獲救，其餘16個乘客同機組人員罹難。策劃依場爆炸嘅兇手，最初目標竟然係時任總理周恩來？

講返少少背景資料先，當時以周恩來為首嘅中國代表團準備去印尼萬隆參加亞非會議，打算於會上提出緩和台灣地區緊張局勢嘅立場。最初嘅安排係，周恩來先飛到香港，然後轉機，乘搭印度航空借出嘅「喀什米爾公主號」去印尼。點知台灣方面知道周恩來出訪，認為係暗殺佢嘅時機，於是派情報人員收買香港啟德機場嘅清潔工人周駒，喺「喀什米爾公主號」右翼輪艙附近放置「牙膏炸彈」。

當日「喀什米爾公主號」飛行幾小時後，飛機去到北婆羅洲海域上空，突然傳出爆炸巨響，機身陷於火海，系統失靈。飛機最後逼降，於濃煙之中插入海面，多人罹難。空難發生之後，北京向英國施壓，要求嚴查事件。1955年港英政府向中國提交報告，提到炸彈狂徒周駒收咗國民黨一大筆錢。

熟悉歷史嘅人都知道，周恩來當時逃過一劫，來龍去脈究竟係點？話說周恩來出席萬隆會議之前，接到緬甸總理吳努同印度總理尼赫魯嘅邀請，先去緬甸仰光傾一傾會議嘅協作事宜，之後再飛去萬隆，因為行程改變，最終無搭到「喀什米爾公主號」。而兇手周駒之後被安排偷渡到台灣，基於香港同台灣之間並無引渡條約，所以最終港府咩人都拉唔到。

原圖取自網絡。