早兩日講起袁世凱同「湖南才子」楊度，今日就講埋另一位仁兄——堅決反對袁世凱稱帝、夠膽搣爛袁世凱張支票嘅莊蘊寬。

莊蘊寬生於清同治五年（1866年），出身江南望族嘅佢成年後加入官場，喺兩廣一帶任職，做過廣東常備軍統領、廣西梧州知府，期間識咗革命派黃興同孫中山，並且加入咗同盟會。喺辛亥革命之後，莊蘊寬獲推舉為江蘇都督，喺袁世凱出任大總統之後，莊蘊寬先後出任浦口商務督辦，以及肅政廳都肅政史兼約法會議參議員。

喺1914年，袁世凱密謀稱帝，當時有60名參議員，當中有59名都支持總統制，只有莊蘊寬主張責任內閣制。到咗1915年，袁世凱密謀稱帝，莊蘊寬就以都肅政史名義去信袁世凱，叫佢懸崖勒馬，講到明「帝制不可為」，仲建議要「取消洪憲年號，撤消大典籌備處」。袁世凱梗係唔聽，反而派人送咗張20萬元支票俾莊蘊寬，暗示佢要識do。莊蘊寬見到張支票之後好嬲，即刻當場撕爛張支票，並鬧走送支票嘅人。袁世凱知道結果自然嬲到爆炸，並派人監視莊蘊寬，等機會拉佢。

莊蘊寬知道自己身陷險境，就喺總統府秘書長張一麐幫助之下扮成僕人，跟隨張一麐上火車，走去天津避難。佢喺袁世凱死後先返去北京，出任審計院長。1925年故宮博物院開幕，莊蘊寬亦有份主持開幕典禮。

原圖取自網絡。