呢排睇新聞，話台灣鴻海集團董事長郭台銘參加國民黨總統初選，如果最後郭台銘真係成為候選人，咁選情就真係刺激喇。根據《福布斯》公布嘅2019年富豪排行榜，郭台銘以63億美元蟬聯台灣首富寶座，因為佢身家豐厚，唔少人都放長雙眼，睇緊佢有無機會成為美國總統特朗普嘅翻版，以富豪身份變身為領袖。今日一於同大家介紹吓郭台銘，回顧佢嘅發跡史。

郭台銘1950年生於台北縣板橋市，家境貧寒，係家中嘅長子。喺1966年，郭台銘入讀台灣嘅中國海事專科學校，半工讀完成學業，服完兵役之後就喺復興航運公司工作。佢1974年用30萬台幣資本創立「鴻海塑料企業有限公司」，生產黑白電視機選台按鈕。公司逐漸轉虧為盈，佢就喺日本買設備開設模具廠，又投資電鍍部門同衝壓廠。八九十年代，全球進入個人電腦時代，鴻海憑住成熟嘅模具技術，以量大、低價策略，生產連接機同機殼等產品。

喺1985年，郭台銘喺美國成立富士康（Foxconn）開拓海外市場，1988年喺深圳設立富士康精密組件廠，近年富士康嘅生產基地擴展到中國28個城市，一共47個廠區，蘋果公司嘅iPhone亦都係由富士康生產。不過佢嘅工廠曾經多次有員工自殺，令外界關注工人工作環境，郭台銘當年亦為此道歉。

講返今次選舉，郭台銘目前對手包括前立法院長王金平、前新北市長朱立倫等，不過輿論更為關注嘅，係高雄市長韓國瑜嘅取態，唔知大家又點睇？

原圖取自網絡。