阿史睇新聞見到好耐無喺香港露面嘅歌手陳美齡會同仔仔合作，喺今年書展出旅遊書。講起陳美齡，好多年青人可能無乜印象，其實佢係70、80年代嘅著名歌手，只不過後嚟去咗日本發展兼嫁咗個日本老公先漸漸喺香港娛樂圈淡出。陳美齡唔單止唱歌好聽，佢同時亦係演員、作家同大學教授，而三個仔仔更先後考入史丹福大學，所以陳美齡又有「史丹福媽媽」之稱。早於80年代初，陳美齡為咗令日本人直面第二次世界大戰嘅真相，試過喺綜藝節目展示南京大屠殺嘅相，引起日本人嘩然，去更因此收到恐嚇信。

陳美齡由14歲開始唱歌，已經好受歡迎，1972年應邀去日本發展，火速得到廣大日本年青人喜愛，人氣爆燈，曾經三次出席紅白歌唱大賽。而就喺佢歌唱事業最高峰嗰陣，去咗加拿大留學，學成後再復出，但人氣已經不復當初。

1986年，陳美齡同日本經理人結婚、生埋大仔，但依然無放棄工作，仲帶埋個仔返工，呢個行為喺日本引發「女性應否同時擁有家庭和事業」嘅熱烈討論。陳美齡亦因此被史丹福大學嘅學者注意，隨後受邀去史丹福大學探討美日兩國嘅男女差別待遇問題，取得教育學博士學位。陳美齡除咗專注教育事業之外，亦會不時參加慈善活動，佢曾任日本聯合國國際兒童緊急基金協會大使，喺日本福島地震之後，陳美齡仲親自到福島視察。

圖為陳美齡一家五口，原圖嚟自陳美齡細語fb專頁。