最近秘書妹妹睇緊套電視劇《步步驚心》，劇情係講康熙年間九子奪嫡嘅故事。秘書妹妹對兩大男主角唔嗒糖，反而好鍾意男配角十三阿哥胤祥，話佢好man好深情。劇入面，雍正同胤祥雖然係異母兄弟，但感情就好過同胞兄弟。歷史上，胤祥唔止係雍正嘅好兄弟，仲係佢嘅得力助手，因此胤祥死後被雍正封為「鐵帽子王」。

胤祥自幼喪母，改由雍正生母德妃撫養，所以自細同雍正感情幾好。雍正登基之後，隨即封胤祥做和碩怡親王，將戶部、西北軍事等重要政事交俾佢負責，可見雍正對胤祥相當信任。而胤祥亦無好似之前講過嘅重臣年羹堯咁恃寵生驕，為人好低調，從嚟唔喺自己府上接待朝臣。連最討厭人結黨營私嘅雍正，都下旨叫大臣多多同胤祥往來。

而胤祥都無辜負雍正嘅信任，喺佢總理戶部期間，追繳虧空、革除弊政，充盈咗國庫，為雍正嘅各項改革奠定咗經濟基礎。後嚟胤祥逝世，雍正悲痛不已，將胤祥怡親王嘅爵位升做「鐵帽子王」（清朝規定，子孫承繼爵位嗰陣每代都要降一級，而「鐵帽子王」就無需降級，可按原爵位繼承）。胤祥原本為咗避諱雍正嘅名而改名為「允祥」，喺佢死後雍正允許佢保留「胤祥」之名，成為雍正年間唯一得以保留「胤」字嘅皇帝兄弟。

圖為《步步驚心》劇照同胤祥畫像，原圖嚟自網絡。