尋日就同史友們介紹過歷朝歷代嘅皇帝都有自己嘅方法令到御前待衛對自己忠心，而呢啲御前待衛喺歷代被重用嘅程度都唔一樣，明朝就曾經有掌握大權嘅錦衣衛，而喺清朝亦都相傳雍正皇帝身邊有班專用血滴子嘅高手，咁到底呢一點係真係假呢？阿史今次就同大家講一講啦！
「血滴子」呢種傳說中嘅武器，相傳可以喺二十步之內取到對手人頭，係雍正用嚟剷除異己，鞏固皇權嘅工具，之不過呢種武器似乎就未喺正史當中出現過，咁到底又係咪真實存在呢？
喺唔少清末民初評書好似《雍正劍俠圖》、《胤禛外傳》等等，都有提過血滴子呢種武器，喺《茅山奇談錄》甚至仲有講過血滴子形狀就似鳥籠，表面有皮革，並且係以一條鐵鏈連接住幾把刀，只要一套到落對手頭上，一經拉動刀刃就會拉出，到時對手就真係成個頭甩出嚟。
呢種咁神奇嘅武器就咁聽都覺得難用，實際上係咪存在都仍然係一個謎，但喺雍正身邊就確實有個名為「粘桿處」嘅組織，粘桿處嘅原身本來就係雍正仲係皇子之時專門設立嘅部門，職責就係以「粘桿」消滅樹上嘅蟬，而後來佢成為皇帝後就將政敵比喻成蟬，呢個組織就係專門幫佢刺探情報、剷除異己，真係估佢唔到！
原圖嚟自網絡