阿史前排同朋友上內地食飯、行吓，期間有位新朋友無啦啦講起舊時社會歷史。話說喺新中國成立之後，當局希望整頓社會風氣，於是各大城市都展開一系列嘅禁娼措施，且取得成效，而呢啲措施，主要都係參考大連1946年嘅成功經驗。

喺1945年8月，日本投降之後，大連就由蘇聯接管，10月成立咗大連市人民自治政府，翌年，自治政府就發起「禁三害（煙、賭、娼）」運動。根據當時嘅記錄，大連登記嘅妓院有30幾間，共超過700名妓女，而妓院以外嘅私倡就估計有2000名左右。喺1946年夏天，大連就整治妓院、禁止妓院營業，呢700幾名妓女主要都係因為日本殖民管治期間，因為生活困難而淪為娼妓，有啲更加係細細個就被賣去妓院，大部分人都未讀過書。

因為呢班妓女長期從事賣淫，無其他生活技能，喺班妓院老闆鼓動之下，啲妓女都有唔少反對聲音。於是大連就決定調運糧食俾妓院，保證呢班妓女生活，之後就推行宣傳教育，希望班女性可以自食其力，另一方面又向佢哋提供技能課，教授紡織等技術，令佢哋有一技之長。大連政府承擔妓女嘅生活，等佢哋專心學習技能，並根據情況為佢哋分配工作，喺出糧之前仲提供生活費俾佢哋，對於想返鄉下嘅妓女，自治政府仲會俾路費同生活費佢哋。政府最終用咗3年時間，處理好區內嘅娼妓問題，之後新中國成立，各城市亦參考大連嘅方法禁娼，令社會風氣得到改善。

圖左為管教幹部，取自網絡