前排睇新聞見到瑪麗醫院進行重建，提到工程期間有機會發現戰時炸彈，到底咩事？話說喺1929年，港督金文泰宣布要喺港島區興建一間比九龍醫院更大嘅公立醫院，新醫院選址响薄扶林道同沙宣道對上。醫院由1933年開始興建，1937年4月13日落成啟用，由接替金文泰出任港督嘅郝德傑主持開幕禮式，並以英王喬治五世嘅王后瑪麗命名。

瑪麗醫院當時係遠東規模最大嘅醫院，啟用無幾耐就成為香港大學醫科生臨床實習同教授嘅地方。喺二戰期間，瑪麗醫院曾被日軍佔領，徵用為軍用醫院，直至1945年10月1日，瑪麗醫院先至重新運作。至於點解瑪麗醫院會有戰時炸彈，其中一個講法就係話當時日軍佔用咗薄扶林144號教會一座大古堡（而家港大大學堂宿舍）做憲兵總部，炸彈有機會係美軍轟炸日軍憲兵總部嘅時候，誤投醫院附近。

圖片為1950年嘅瑪麗醫院。