李鴻章作為晚清重要嘅政治人物之一，被稱為「東方俾斯麥」，而李鴻章亦非常自負，佢曾經喺接待美國前總統格蘭特嘅時候講過：「我們是世界上最偉大的兩個人，我們鎮壓了歷史上有名的兩支叛軍。」講起格蘭特同李鴻章，佢哋兩個嘅友情亦為人所樂道。

格蘭特曾經做過美國南北戰爭嘅聯邦總司令，屢建奇功，仲出任兩屆美國總統。李鴻章雖然係一介文官，但就以鎮壓太平軍出名，亦非常敬佩格蘭特，所以佢話自己同格蘭特係世界上最偉大嘅人。格蘭特卸任美國總統之後，同太太環遊世界，當李鴻章得知格蘭特坐船嚟天津嘅時候，特登設宴款待，兩人一見如故。

李鴻章見到格蘭特隨身有一支嵌滿寶石嘅手杖，把玩之後簡直愛不釋手，但呢支手杖係美國工商界送俾格蘭特嘅卸任禮物，唔能夠私自轉贈。格蘭特就表示之後回國會徵得大家同意再贈予李鴻章。點知格蘭特回國後諸事繁忙，之後仲過身，未能及時送出手杖。17年後，李鴻章以總理大臣嘅身份到訪紐約，特地去拜訪格蘭特妻兒。格蘭特夫人深受感動，邀請咗工商界名人，將當年格蘭特應承轉贈手杖俾李鴻章嘅事講返出嚟，結果得到大家熱烈嘅掌聲，手杖亦喺當場轉贈予李鴻章。自此，李鴻章視手杖如稀世珍寶，片刻不離身，呢件事亦成為一時佳話。

圖為李鴻章、格蘭特合照，原圖嚟自網絡。