香港嘅殖民地歷史，同清代簽落嘅條約有關。喺1840年，英國同清廷爆發第一次鴉片戰爭，清軍節節敗退，雙方喺1842年8月開始議和，29日清廷代表欽差大臣耆英、伊里布同英國代表砵甸乍（又譯璞鼎查），喺康華麗號簽署不平等嘅《南京條約》，令戰事正式結束。《南京條約》內容包括割讓香港島；開放廣州、福州、廈門、寧波、上海五個通商港口；賠償2100萬元等。翌年，清廷被迫簽署《虎門條約》同《中英五口通商章程》，作為《南京條約》嘅補充條款，令清廷失去關稅自主權、領事裁判權。

除了《南京條約》，到咗1860年清廷簽署嘅《北京條約》割讓界限街以南九龍半島同昂船洲俾英國，1898年清廷再簽署《展拓香港界址專條》，將新界租借俾英國99年，令香港一度成為殖民地。而當初有份簽署《南京條約》嘅砵甸乍，其後成為香港首位總督，响1843年至1844年期間任職。

圖為《南京條約》、簽署情況，取自網絡。