最近有朋友學車，學到叫苦連天，居然仲話自己唔識路，阿史身為路人真係聽到都驚。其實每條道路都好重要，連接唔同地方，為大家提供方便，好似有「神州第一路」之稱嘅瀋大高速公路，唔單止貫通瀋陽同大連，仲係中國第一條高速公路。瀋大高速公路响1984年6月開始興建，用咗6年幾時間建成，喺1990年9月通車，前後用咗大約22億元人民幣。不過喺當年，有人質疑值唔值得使咁多錢去起條高速公路，加上當年嘅科技水平無而家咁好，所以條路嘅興建過程一啲都唔易。

當年嘅科技同設備都無而家咁先進，瀋大高速公路設計者之一薛景為就話當時無全站儀、衛星定位系統，所有設計人員唯有沿住路線徒步展開勘測工作，由瀋陽去到蓋縣足足200幾公里，行咗超過40日，仲要現場計算同複核測量數據，兼且要繪製路線圖，都咪話唔辛苦！

前遼寧省交通廳廳長連承智講過，當年有人提出倒不如將起公路呢22億拎去開廠，如果開11間廠，每間就可以投資2億，效益更高。而薛景為亦都話，當年好多老百姓都唔理解高速公路係咩嚟，係到咗開通之後，大家先知原來係幾咁方便，原本由瀋陽揸車去大連單程要成12個鐘，但自從有咗呢條「神州第一路」，一日就可以來回走兩轉！

圖為瀋大高速公路，取自網絡。