一代傳奇才女張愛玲離世已經24年，但佢為後世留低嘅《半生緣》、《傾城之戀》、《秧歌》等唔少經典，依然係各大影視作品嘅熱門題材，歷久常新。小說以外，張愛玲自身經歷都係一部傳奇。家世顯赫嘅佢自細甚少感受到父母嘅疼錫，雖然喺文學屆成名甚早，但自己嘅婚姻生活並唔如意，兩次婚姻都以悲劇收場，張愛玲最後仲喺1995年9月被發現於美國屋企逝世。

講到張愛玲喺美國嘅生活，同昔日喺舊上海簡直差天共地。1955年，張愛玲孤身一人以難民身份搭郵輪由香港去美國，最初喺美國嘅落腳點只係「救世軍」嘅女子宿舍。後嚟，張愛玲申請搬去文藝營，認識咗佢嘅第二任丈夫賴雅。賴雅比張愛玲大30歲，身體、經濟狀況亦唔好。

據文學評論家夏志清同張愛玲來往嘅信件可以得知，張愛玲喺美國嘅日子並唔好過，美國同上海文化差異大，張愛玲嘅作品喺當地唔多受歡迎，更曾喺1957年被退過稿。退稿信將佢嘅《粉淚》（即《怨女》）彈到一文不值，話作品骯髒，入面所有人物都令人反感，仲話如果呢篇小說有人出版，都唔知啲批評家會講乜。

張愛玲再難以佢嘅一支妙筆去謀生，唯有被逼做翻譯、教書、專題研究嚟搵食。可惜，張愛玲由於不善交際、亦唔擅長做研究，唔少工作都以離職收場。尤其係當賴雅病重，張愛玲嘅負擔就更重。賴雅中風過身之後，張愛玲變得更加孤僻，深居簡出，最後孤獨離世。

原圖嚟自網絡。