早幾日係中秋節，傳統上都會同屋企人食飯、團聚，不過响1932年嘅中秋節翌日，就發生咗著名嘅「平頂山慘案」，令當年嘅節日成為難以磨滅嘅傷痛。呢單慘案源於當年9月15日中秋節晚上，一支遼東民眾抗日自衛軍途經撫順平頂山村，襲擊日軍楊柏堡採炭所、倉庫、工廠、派出所等設施，又殺死咗採炭所所長渡邊寬一。到咗16日，日軍遷怒於平頂山嘅平民，屠殺超過3000人，只有幾十名村民成功走甩。

當時日軍嘅設施受襲之後，日軍怪責平頂山村民唔及時通報，指佢哋「通匪」，於是日軍就集齊守備隊、憲兵隊同警察署等200多名軍警，先將3000多名村民趕晒落山，之後就用機關槍掃射，村民隨即倒地，為防有村民詐死，日軍再用刺刀插地上嘅村民。日軍為咗毀屍滅迹，就炸咗座山，掩埋村民啲屍體，又上山再全村房屋燒晒，呢件慘劇被稱為「平頂山慘案」。1970年，當局就開始挖掘平頂山慘案遺址， 1972年遺址館落成供大眾參觀。

有生還者嘅兒子分享，當年日軍行兇後周圍發公告，命令唔可以收留平頂山生還者，違者就當係「通匪」、處死全家。佢爸爸逃過一劫之後都唔敢投靠親戚，只能夠喺個菜園匿埋，直至有個好好人嘅老主顧願意冒風險收留，先至保得住條命。

圖為遼寧嘅平頂山殉難同胞紀念碑、出土彈頭同彈殼，取自網絡。