南太平洋島國所羅門尋日宣布同台灣斷交，結束三十多年嘅邦交關係，改為同大陸建交，令台灣目前只剩下16個邦交國。所羅門係台灣於太平洋面積最大、人口最多嘅邦交國，數數手指，連同今次在內，蔡英文任內共有6個邦交國與台灣斷交，包括加勒比海島國多明尼加、擁有國際貿易同海運航線嘅巴拿馬等。北京清華大學台灣研究院副教授鄭振清認為，兩岸官方自2016年5月以來（蔡英文上任後）缺乏政治互信，咁樣落去，台灣嘅對外交往「肯定無保障」。

查返資料，台灣响蔡英文、馬英九及陳水扁執政時期都分別有邦交國與台灣斷交，好似兩年前嘅巴拿馬咁，佢當時係同台灣建交最耐嘅邦交國，兩地嘅關係可以追溯到去清朝，有成107年歷史，不過始終都係「分手」收場。

至於馬英九時期，就只有一個——西非嘅岡比亞與台斷交。而非洲嘅塞內加爾、之前同希臘有國名爭拗嘅馬其頓、非洲國家乍得、中美洲嘅哥斯達黎加等，都係响陳水扁執政時期與台斷交。

台灣東海大學政治學系助理教授林子立分析，太平洋島國經濟開發度低，相關政府近年希望加快建設，因此需要外資，而目前最有資金做海外投資嘅，正正就係中國，佢唔排除該區域有更多台灣嘅邦交國會改為同大陸建交。廈門大學兩岸關係和平發展協同創新中心執行主任劉國深表示，如果台灣持續採用與內地對抗嘅模式，活動空間只會被進一步被壓縮。

台灣方面表示，今日會關閉所羅門閉大使館，並撤回派駐當地嘅醫療同技術團隊。所羅門與台灣斷交後，台灣目前剩下嘅邦交國包括梵蒂岡、危地馬拉、洪都拉斯、海地、尼加拉瓜、馬紹爾群島等。

原圖嚟自網絡。