47年前嘅9月底，對中國同日本嚟講都係重要日子。喺1972年9月29日，中國總理周恩來、外交部部長姬鵬飛連同到訪嘅日本首相田中角榮、外務大臣大平正芳，喺北京人民大會堂簽署《中日聯合聲明》，象徵中日兩國正式建交，不過原來當時發生咗一件小插曲，差啲搞到雙方好唔happy。

喺9月25日早上，上台執政只有2個幾月嘅田中角榮連同大平正芳等多名政府官員嚟到北京訪問，到埗之後稍作休息就展開會談。當晚，周恩來喺人民大會堂設宴歡迎田中角榮一行，田中角榮致詞嘅時候，形容兩國關係過去幾十年經歷咗不幸嘅過程，日本為中國國民「添了很大的麻煩」。中方人員一聽到「添麻煩」呢個措辭之後，即刻嚴肅起嚟，成個氣氛唔同晒。

去到第二日，周恩來好嚴肅咁指出，田中角榮「添麻煩」呢個表述引起中國人民強烈反感，日本軍國主義嘅侵略戰爭為中國人民帶嚟災難，用「添麻煩」呢個字嚟表述並唔恰當。田中角榮就解釋，個字眼喺日文嚟講有誠心誠意謝罪、以後不再犯、請求原諒嘅意思，又話如果咁表達唔合適，日方可以按中國嘅習慣更改。

經過幾日嘅談判，中日兩國喺9月29日簽署《中日聯合聲明》，寫有「日本方面痛感日本國過去由於戰爭給中國人民造成的重大損害的責任，表示深刻的反省」。

圖為《中日聯合聲明》簽署儀式，取自網絡。