四中全會呢幾日喺北京舉行，或者大家都會好奇，到底「四中全會」係咩嚟呢？阿史今次就介紹吓。新聞所講嘅「四中全會」，其實就係指「第十九屆中國共產黨中央委員會第四次全體會議」，參加會議嘅中共中央委員會委員（簡稱中央委員），包括黨政部門嘅主要負責人、各省書記同省長，以及軍隊主要負責人等等。

今次出席會議嘅中央委員，係由2017年召開嘅中共第十九次全國代表大會選出。按照規律，中共中央委員會5年任期之內會召開多次會議，通常係7次，每年至少1次，而每次都會有相對固定嘅主題，一般嚟講：一中全會選舉產生中共中央總書記、中央政治局成員，以及其他中央部門成員；二中全會推薦國家主席、全國人大、國務院、全國政協、中央軍委等等人選；三中全會就通常聚焦經濟發展嘅重要決策，例如1978年嘅改革開放政策，就係由第十一屆三中全會產生；四中全會就重點研究部署國家治理方面嘅重大決策。根據官方報道，今次四中全會嘅主題，就係部署「推進國家治理體系和治理能力現代化」。

一般嚟講，會議為期四天，會議期間唔會對外開放，但就會喺會議閉幕當日以《公報》形式向外界闡釋會議成果。今年嘅四中全會將於聽日（31/10）閉幕。

以上就係中國國情嘅其中一方面，從關注中國發展嘅角度嚟講，中共嘅每一次「全會」，都絕對係了解中國大政方針嘅好窗口。

原圖取自網絡。