尋晚講完花園街大火，今次就介紹吓另一單發生响1996年嘅嘉利大廈5級火，呢場大火最初係由一啲火屑引起，但最終就釀成41人死、80人受傷嘅慘劇，真係唔可以睇小火嘅威力。

嘉利大廈大火發生响1996年11月20日嘅下晝4點幾，當時嘉利大廈進行緊電梯更換工程，工人喺電梯槽入面進行燒焊，但點知有火屑跌咗落1樓、2樓電梯槽嘅木板，並且燒著木板同其他建築材料，由於煙囪效應，火勢迅速沿電梯槽向上蔓延至大廈高層。大廈內嘅人爭相逃命，有人爬窗逃生嘅時候，因為體力不支而跌落平台，亦有人喺窗邊呼救期間被身後嘅烈火燒死。

呢場大火燒到翌日下晝1點幾先至被救熄，一共奪走41條性命，包括殉職嘅二級消防隊目廖熾鴻，有部分死者遺體被嚴重燒焦，只能靠驗DNA辨認身份。