相信唔少史友都有睇到阿史早兩個月分享出嚟嗰段有關敦煌展覽──「敦煌──說不完的故事」嘅短片，早幾日，阿史我終於抽到時間去沙田文化博物館睇下呢個展覽。不過，老實講，阿史睇完嗰展覽，心中真真正正有說不完的故事……

正如展覽嘅介紹一樣，敦煌可以話係一個充滿故事嘅名字，敦煌曾經係古代絲綢之路同中西文化接觸交融嘅名城重鎮，被譽為中國千年文化嘅百科全書；但卻竟然响16至20世紀初因為無人管理而變得荒涼凋零、經卷流散。直到20世紀中葉，中國學者先開始正式研究、保護及管理敦煌石窟，敦煌嘅風采先能夠再現人前。

成個展覽最特別當然係複製咗三個極具代表嘅洞窟，分別建於初唐、元代晚期同埋十六國晚期嘅北涼時期，各自都有唔同嘅代表性。另外一個重點展品就係一尊長達13米嘅涅槃佛像彩塑臨本。

不過，最令阿史看得有感覺嘅，竟然係幾塊展板。展版講述咗响1900年左右發現藏經洞嘅道士王圓籙，點樣將啲珍貴文物不斷咁用賤價賣出去，當中包括咗來自英法等地嘅探險家，直接導致咗研究敦煌嘅珍貴資料如今仍然四散全球。當然，王圓籙本身根本未必知道呢啲文物嘅真正價值，但最令阿史憤怒嘅係即使清廷後來知道咗而安排將經卷運返北京，一部分就被王圓籙事先收埋咗，一部分就被經手嘅官員順手牽羊。令經卷運到北京時已經少咗一大截。無論係咩動機都好，咁樣嘅做法，真係可以話係愧為中國人。正如當世著名史學家陳寅恪亦曾言：「敦煌者，吾國學術之傷心史也。」

唉，中國人要自強，中華民族要自強，就一定要從根本上改變民族嘅一啲劣根性，敦煌嘅文物經卷流落世界唔同地方嘅過程，已經充份證明咗呢點。對比早排香港嘅解款車跌錢事件所引起嘅瘋狂執錢，其實某程上亦睇到呢個劣根性仲未根除到。

身為中國人嘅史友們，一齊加油啦！

圖片說明：阿史