晩清時代一個著名思想家康有為，响90年前嘅今日，即係1927年3月31日逝世。

康有為係廣東南海縣人，年少時因接觸過西方著作而產生先進及改革思想。光緒年間，佢响廣州設立萬木草堂，收徒講學，著名弟子就有梁啓超。响1895年，康有為到北京參加乙未科會試，佢得知清廷同日本簽署《馬關條約》後，佢聯合1300名舉人上萬言書，呢次就係著名嘅「公車上書」。到咗1898年，光緒帝起用康有為梁啟超等人，推行變法，史稱戊戌變法。不過，呢場變法改革內容過於急進，最終因慈禧太后發動政變而告終。

戊戌政變後康有為逃至北美，成立中國維新會，鼓吹君主立憲，同革命黨對立，仲曾經諗住派人暗殺孫中山。清朝被推翻後，康有為仍然支持清室，响二十年代佢返咗中國响青島生活，期間去過天津覲見溥儀。1927年3月29日，佢响青島參加同鄉宴，宴後嘔吐，最終於3月31日不治。對於佢嘅死，有人話係國民黨派人買起佢，但佢屋企人就話應該只係酒樓啲嘢食唔乾淨。