走佬點解叫「著草」？

以前同朋友遊大富翁個陣，好多時玩到欠人好多錢時就會話輸到要走佬，又或者會講要「著草」，因為走佬「著草」唔見咗人，就可以逃避所有責任喇！因為想搵你都搵唔到。

走佬同著草，响廣府話裡面都有一走了之嘅意思，咁係點嚟嘅呢？走佬，其實係由走路演變出嚟，呢個路字意思就係潛逃之路。响清人嘅《清稗類鈔．會黨類．三十六誓》有載：「兄弟患難之時，無銀走路，必要相幫，錢銀水腳，無論多少。如有不念親情者，五雷誅滅。」無銀走路意思就係無錢走佬咁解。

至於著草，基本上同走佬意思差唔多。响古時，啲人遠行時就會著草鞋。個陣交通唔方便，一般人唔會遠行，除非係有要事在身，又或者要潛逃先會著草鞋一走了之，著草呢個講法亦係咁演化出嚟。