船灣淡水湖嘅歷史阿史好耐之前已經介紹過，最近睇返一篇報道，先知道原來香港中文大學個校園係同船灣淡水湖有關。

船灣淡水湖同中大校園都有一段距離，又唔係响同一區，咁有乜關係呢？原來興建船灣淡水湖嘅石材，就係嚟自中大校園。正確嚟講，係嚟自依家中大校園嘅幾個山頭。話說當年船灣淡水湖嘅核心工程就係興建主壩以及兩條副壩，單係主壩就有成2公里，起壩就自然需要用上石材，於是就响馬料水附近山頭採石，作為建築材料，再運到去船灣個頭建造主壩。而馬料水個幾個山頭被開採完之後，產生咗大約150畝平地，呢啲地方就用嚟興建大學校舍，亦即係後嚟中大嘅聯合書院同新亞書院所在位置。係咪估唔到船灣淡水湖同中大校園原來係有咁嘅關係呢？

原圖：http://dragageshk.com/