中文大學嘅教學醫院——威爾斯親王醫院

又係時候同史友們介紹下一啲香港嘅基建，今年受到疫情嘅衝擊，大家生活都有好大嘅改變，醫院更加成為一個前所未有咁重要嘅地方。咁今次阿史就同大家介紹一下全港兩間嘅教學醫院之一，威爾斯親王醫院。

威爾斯親王醫院，位於沙田區嘅圓洲角，係一所提供第三層醫護服務嘅大型公立全科醫院，目前可以提供1,700幾張病床。威爾斯親王醫院除咗係一間醫院之外，同時都係中文大學嘅教學醫院，每年都培訓唔少醫護人員。

關於呢間以英國王儲威爾斯親王封號命名嘅醫院，早喺1970年代就已經進行規劃，並且喺1978年10月動工。工程歷時接近6年，威爾斯親王醫院就喺1984年4月30日正式啟用。威院嘅設施其實唔係一開頭就咁完善，就好似「包玉剛爵士癌症中心暨包黃秀英女士兒童癌症中心」要1994年11月先揭幕，當時仲搵嚟英國皇儲威爾斯親王揭幕；至於後來新大樓內科及外科住院服務，就係去到2010年先啟用。