講起校園鬼故，最出名嘅莫過於中大嘅辮子姑娘，而中大嘅「一條辮路」亦都因佢得名。

呢個故事大概喺60、70年代開始流傳，話說有一晚，有個中大男學生啱啱喺圖書館溫完書，打算沿校內一條小徑返宿舍。夜媽媽，成條路一個人都無，個男仔行咗無耐，竟然見到有個著住白衫、紮住條辮嘅女仔喺度喊。於是個男仔就行上前睇吓有咩幫到手，但係個女仔一直用背脊對住佢。男仔就忍唔住話，不如你擰轉面再講，個女仔就答：如果你見到我個樣，你會嚇親。個男仔以為對方只係怕醜，梗係拍晒心口話唔會喇。點知，當個女仔真係擰轉頭嘅時候，男仔當堂嚇到暈咗！因為個女仔係無面㗎，佢塊面同背面一樣，都係得條辮……聽講，個男仔被嚇到精神錯亂，最後要送入青山。

傳聞呢個辮子姑娘係由內地落嚟嘅偷渡客，因為要逃避車上驗票員查票，情急之下唯有跳車，點知就被車門夾住條辮，最後頭皮、臉皮被扯爛慘死。仲有說法話辮子姑娘原本係中大學生，因為不堪被男友拋棄，就喺校內一棵大樹上吊自縊，自此徘徊喺校內小徑，將自己條辮纏繞喺路過嘅人條頸上，而且專嚇男仔，呢條路又叫做「一條辮路」。

不過，有中文大學舊生兼講師話，佢讀書果陣，「一條辮路」嘅故事無咁複雜，只係話條路有時會出現一個得條辮、無樣嘅幽靈，而頭先講嘅火車情節係後來創作嘅。

原圖嚟自網絡。