相信大家都知宋王臺係為咗紀念南宋兩位末代皇帝逃難到香港嘅一段歷史。其實阿史以前都介紹過，依家嘅東九龍一帶响古代係官辦鹽場，呢個可能亦係南宋皇帝响呢度設立行宮嘅原因。當時呢一帶叫官富場，响南宋時已經係一個具規模產鹽之地。而响明清史籍當中，都有記低「官富巡司」呢個地方嘅位置。有本地學者指出，之前响九龍城港鐵工程發現嘅宋井，就係官富場存在嘅重要明證。