有同事早兩日搭巴士，經過九龍城迴旋處，望到天橋底有個靠背石變電站，覺得個名好特別，忍唔住阿史個名究竟點嚟。為咗維持良好嘅工作環境（唔會講過你知係女同事），阿史一於拍心口應承一齊研究研究。

綜合資料所得，原來「靠背石」又叫「筊杯石」，係九龍城迴旋處嘅戰前舊名。話說嗰度當時有塊岩石，係由中間裂開，個外形好似用嚟求神問卜用嘅筊杯，因而得名。後嚟二戰期間，日軍侵佔香港，為擴建啟德機場，亂咁拆咗九龍城寨嘅城牆同炸毀宋王臺，搞到啟德一帶面目全非，筊杯石就因為咁而消失。嗰度原本有條筊杯石村，不過後嚟已經唔存在。

依家嘅「靠背石」已經變成九龍城迴旋處，連接太子道、亞皆老街、馬頭圍道等，係九龍區其中一條交通大動脈，車流好頻繁架。